БНКУ-аас Монгол Улсад суугаа Элчин сайд Адилбаев Жалгас-ыг хүлээн авч уулзлаа

БНКУ-аас Монгол Улсад суугаа Элчин сайд Адилбаев Жалгас-ыг хүлээн авч уулзлаа

Нийслэлийн Шинжлэх ухаан, үйлдвэрлэл, инновацын газрын дарга Б.Мөнх-Оргил 2020 оны 06 сарын 17-ны өдөр Бүгд Найрамдах Казахстан Улсаас Монгол Улсад суугаа элчин сайд Адилбаев Жалгасыг хүлээн авч уулзлаа.


Уулзалтын эхэнд Нийслэлийн Шинжлэх ухаан, үйлдвэрлэл, инновацын газрын дарга Б.Мөнх-Оргил, Монгол Улс болон Казахстан Улсын хооронд дипломат харилцаа тогтоосны 28 жилийн ой тохиож байгааг дурдан өнөөдрийн уулзалтыг бидний цаашдын урт хугацааны харилцаа, хамтын ажиллагааны эхлэл хэмээн бэлэгшээж буйгаа илэрхийллээ.
Уулзалтаар Улаанбаатар инновацын төв болон инновацын дэд бүтэц болох Баянхошуу, Сэлбэ бизнес инкубатор дэд төвүүд, мөн үйлдвэр, технологийн паркуудыг танилцуулж Казахстан Улсын нэрэмжит танхим байгуулах талаар санал солилцов.


Түүнчлэн газрын дарга Б.Мөнх-Оргил Улаанбаатар хотод инновацын салбарыг хөгжүүлэх, салбарын мэргэжилтнүүдийг туршлага солилцох, мэргэжилтэн бэлтгэх, гарааны бизнес, жижиг дунд үйлдвэрлэлийг дэмжих таатай нөхцөлийг бүрдүүлэх зорилгоор Казахстаны технологи, инновацын төвүүдтэй харилцаа, хамтын ажиллагаа тогтооход дэмжлэг үзүүлэхийг хүслээ.


Элчин сайд Адилбаев Жалгас дэд төвүүд, үйлдвэр технологийн паркууд болон шинжлэх ухаан, технологи, инновацын төвүүдтэй хамтран ажиллаж дэмжлэг үзүүлэхэд бэлэн байгаагаа илэрхийллээ.